| تاريخ المساهمة 01.04.12 23:44 | |
(1)
والدى فى مرة وإحنا بنتكلم عن الشغل والمديرين ورؤساء العمل قالى : يا نور لو معرفتش تِجارى السلطة نافقها إن مكسبتش من وراها هتتقى شرها
(2)
فى بلدنا الفقيرة ثنائى رائع وظريف من تُجار الظفر الرفيع !! طه وعم محمد .. عم محمد بما إنه الكبير فهو المتصرف فى كل شئون التجارة أما طه علشان صغير فى السن فشغلته مرافقة عم محمد أثناء البيع والشراء بغرض الجر أو الشيل إذا لزم الأمر فى أى محاولة لإتمام أى بيعه لازم طه يكون موجود وإلا البيعه ما تتمش والسبب أيه !؟ السبب إن عم محمد كل اللى عليه محاولة إقناع الزبون بالبيعة ولو إحتاج الزبون لإثبات يقوم عم محمد قايل : إحلف له يا طه .. وطه يحلف !! كل ما بشوف الإتنين بفتكر فيلم زوج تحت الطلب بتاع عادل إمام بس الفرق بينهم إن طه مش زوج تحت الطلب طه شاهد تحت الطلب .
(3)
زمان كنت فاكر إن الصوت مش بيخدع زى الكتابة .. وكان عندى قناعة إنى عن طريق الصوت هاقدر أميز الحق من التَصّنع وكنت مُقتنع بالحكاية دى لغاية مدة صغيرة فاتت إتأكدت إن أحيانا القلم الجيد بيبقا ماسكه مُقنَع جيد
(4)
فيه بنات بتردد كتير جداً إنها مش مقتنعة بالفرق بين الولد والبنت وبتقول إن المقتنعين بالفكرة دى رجعيين ومتخلفين لكن ركزوا كده على البنات اللى بتقول ده بإستمرار .. هتلاحظوا إنهم مستحيل يكون عندهم أنوثة كاملة . يعنى تحس إنها مزدوجة صوت بنت وتصرفات ومشاعر وأحاسيس ولد بالذمة دى تبقا أنثى ..!؟
(5)
صاحبى فـ مرة قالى .. عارف يا نور مش بيقولوا مصر هى أمى .. قولت : له آه بسمع كده قالى : أهى أمى دى بقا الأم الوحيدة اللى بتتلذذ بضربات أبناءها بشرط إنها متشوفش إيديهم وهما بيضربوها ضحكت وقولت له : قصدك يعنى أسرق ماما بش مأخليهاش تشوف إيدى قالى : طبعاً أصلها لو شافتها هتقطعها !!
(6)
سامح كهربائى دمه خفيف ومحبوب .. فـ يوم عم أحمد نادى على سامح وقاله : تعالى يا سامح والنبى شوف القفلة اللى فى البيت دى جاية منين .. سامح راح معاه .. ما دا أكل عيشه القفلة طلعت من على السطوح .. راح علشان يصلحها .. وفعلاً صلحها لكن وهوه فوق كان نسى سلك فـ بريزة الكهربا بالطرفين وكمان نهايته مجدولة على بعضها ومرمى على عشة فراخ وبط .! ولما وَصَل سامح الكهربا .. شرارة خرجت قبل الكهربا ما تفصل تانى على عشة الفراخ عُبال ما أهل البيت أخدوا بالهم كانت النار أكلت الدور اللى فوق بالسقف كله واحد بيقول لسامح .. يا أخى حرام عليك قاله سامح بمنتهى التلقائية : وأنا مالى حد كان قاله إعمل عشة فوق السطوح .!
(7)
أبو مروة بناء بس إبن كيف .. قالى : فـ يوم وهو مروح متسلطن أول ما دخلت البيت لقيت الباب إنفتح بسرعة رهيبة وحد خارج منه وشايل جردل مية وبيجرى أخدنى فى رجليه .. جريت معاه .. طلع سِلمه طِلعت وراه وفجأة لقيت نار هاجمة عليه من أوضة وأنا معدى كأنها نار جهنم تصدق يا نور بالله أنا حسيت إنى مُت ودخلت جهنم فعلاً بقيت أحوش النار بإيدى وأقول يا رب مش هاعمل كده تانى وأنا بَصرُخ الناس سابت الحريق وإلتفتت ليا بغرابة شديدة وكان واحد منهم عارفنى .. فـ بـ جردل مية وفـ وشى وطاااااااااااااااااااااااخ الله يسامحه خلانى خسرت حوالى مية جنية تقريباً بقوله ليه ؟ قالى : تمن الكيف يا جاهل ..!
|
|
| |